«A Xunta incumpriu compromisos coa cidade para facer dano ao Goberno municipal»

Compartir

Antón Gómez-Reino (1980), veciño da Coruña, secretario xeral de Podemos Galicia e deputado no Congreso dende 2015, é o candidato de Galicia en Común á presidencia da Xunta de Galicia. Analizamos con el a situación da cidade e os retos ante a nova lexislatura, así como as expectativas da coalición que encabeza.

Que balance fai da lexislatura 2016-2020 para a cidade da Coruña?
A Xunta tivo secuestrada a cidade da Coruña, incumprindo os seus compromisos sistematicamente só por facer dano ao goberno municipal, sen pensar na cidadanía. Os grandes investimentos, como a intermodal, non se levaron a cabo por inacción da Xunta, que nin sequera se puxo dacordo co ADIF. A isto hai que sumarlle outras promesas electorais incumpridas como o caso dos 20 millóns de euros que Feijóo prometeu para impedir a privatización do muelle de batería e Calvo Sotelo do que a día de hoxe non se sabe nada. Tamén a ampliación do CHUAC, longamente prometida e sen terse levado a cabo, pasando por riba incluso das 27 familias que viven ao redor do hospital, que se enteraron pola prensa de que a Xunta pretendía derrubar as súas vivendas. 

Que se xoga a Coruña nestas eleccións?
Ter un goberno a fronte da Xunta de Galicia que se preocupe polos coruñeses e coruñesas e non tome decisións pensando en intereses partidarios. Se eu son presidente da Xunta gobernarei pensando na veciñanza e non en quen goberna en cada cidade. A isto sumámoslle que nós seguiremos a defender a nosa posición en relación ao futuro dos peiraos interiores da cidade para evitar que sexan pasto da especulación, como pretendeu o Partido Popular. Entre os nosos compromisos para a cidade incorporamos no programa electoral unha aposta decidida pola intermodalidade e o transporte público metropolitano. Fronte a un goberno de Feijóo que no último ano de lexislatura só construiu catro vivendas de protección pública, nós garantiremos o acceso á vivenda a todas as persoas menores de 35 anos que o precisen para a súa emancipación.

Cales son as expectativas electorais de Galicia en Común?
As expectativas son boas porque somos unha candidatura diversa, plural e que aglutina diversas sensibilidades. Na Coruña, concretamente, queremos aproveitar o capital político da Marea Atlántica, que apoia e forma parte da candidatura. Estamos vivindo unha campaña que vai a máis, na que percorremos o país de norte a sur, de leste a oeste e falamos con moitos colectivos e con moitas persoas que nos trasladan o seu desexo de cambio. Se nos mobilizamos, tanto na cidade da Coruña como no resto de Galicia, Feijóo será historia de Galicia

Deja una respuesta

Tu dirección de correo electrónico no será publicada. Los campos obligatorios están marcados con *