Volve o Festival de Cabaré

Compartir

O 25 de marzo arrinca no Teatro Colón unha nova edición, e van once, do Festival Galego de Cabaré. Serán catro espectáculos que mesturarán o teatro, a danza, a música e o circo, convertendo a cidade na capital dun xénero que abraza distintas formas de expresión baixo a mesma creación escénica.

O concelleiro de Cultura, Jesús Celemín, mostrou a súa satisfacción polo regreso do festival á cidade tras uns anos de ausencia cun programa “irreverente, satírico e onde a música, o baile, o humor, a maquillaxe e o vestiario se unen nun espectáculo de gran forza, onde o cabaré é cabaré e nada máis”.


O festival que chega da man de máis dun centenar de artistas procedentes de distintas disciplinas, pero todas enlazadas polo mesmo fío condutor de “aleivosía, nocturnidade e un pouco de perversión e provocación”. Quinteiro mostrouse moi satisfeito de que a Coruña recupere un festival “único destas características en todo o país ao integrar diferentes formas de expresión” e que serve para “poñer a cidade herculina no mapa das e dos comediantes de cabaré do século XXI”. Destacou o intenso labor realizado para facer realidade un programa que cualificou “do mellor dos mellores desde o seu nacemento”. Un festival, apuntou, actual, contemporáneo, acorde cos tempos e coas diferentes vertentes que o cabaré adoptou nos diferentes anos.

Programación varidada
O pistoletazo de saída virá o mércores 25 de marzo da man da compañía El Burlesco Malandrín
con “Cabaresque”, un espectáculo que mestura cabaré, o burlesque e show de variedades con toques de jazz, tango e un chisco de “canallismo”. Un show en pequeno formato que recreará un cabaré dentro da caixa para unha capacidade reducida de 70 espectadoras/es que terán un rol protagonista nos xogos de improvisación das actrices e dos actores.


O programa segue o xoves 26 cunha homenaxe a Pía Tedesco con “Life is a cabaret”. Trátase dunha adaptación de diversos espectáculos da compañía de Nelson Quinteiro a través de pezas interpretadas pola artista arxentina. Tedesco, todo un referente no café-cabaré, é considerada unha das grandes estrelas do xénero na actualidade. Do seu talento, lembrou Quinteiro, xurdiron propostas tan interesantes como o Festival “Cabaret Flotante” no lago do Retiro da Casa de Campo de Madrid ou o Festival Iberoamericando de Cabaré FICE 2015.

O venres 27 será a quenda de “Paseando o swing” da man da Swing Machine Orchestra, unha oferta xenuína a cargo dunha banda de doce músicos de corda e bailaríns de distintas procedencias que realizarán un percorrido pola época dourada do swing.


O festival baixará o pano o día 28 coa gala “Femme fatale” na que todo o protagonismo xirará ao redor da vertente feminina do cabaré. Para Quinteiro, no século XXI non se pode facer cabaré sen ter en conta o empoderamento da muller. Música, actuacións aéreas, humor, maxia, danza e moito, moito burlesque poderase ver nesta gala que recolle o espírito das primeiras galas polas que pasaron preto de 500 artistas.


O programa incluirá dúas master class sobre creación de personaxes, linguaxe corporal e
de como poñer en marcha espectáculos de sedución burlesque, que serán impartidos
polas/os artistas e dos que se informará a través da redes sociais.

Deja una respuesta

Tu dirección de correo electrónico no será publicada. Los campos obligatorios están marcados con *